Ocean City - Cape May (60km)

Sin la tscherca da nos cunfins

Sin la carta vesan las distanzas adina ora schi cuortas, en realitad sa denton tut esser empau pli liung. Quei havein nus constatau ier, ils 21-07 cu nus essan semess cun in tandem en direcziun sid.
Ina bellezia via suenter la costa cun vesta sin la mar atlantica. Cunquei ch'ei mava tut agradora (dano tier las punts), havein tertgau ch'ei tonschi da semetter sin via avonmiezdi per turnar la sera.
Finalmein arrivai a Cape May, ha Corina mo pli vuliu ir giud il velo. Quei ei denton stau il sbagl fatal. La cadeina ei vegnida denter la roda da dents. Suenter dar scarpadas e sgiavladas ella calira, havein dumandau nies amitg e gidonter per cussegl.
La finala essan setschentai tier ina stizun da velos, nua che Marco ha gest sez priu ils uaffens enta pugn.
Suenter haver piars custeivel temps ed haver viu nuot da Cape May, essan nus puspei serabitschai sil velo e padelai anavos.
Las combas vegnevan pli e pli staunclas, il tgil fageva pli e pli mal ed il tschiel vegneva pli e pli stgirs ... e nus havevan silmeins aunc la mesadad avon nus.
... oh cooon tup!

Per cletg dat ei amitgs, aschia che nus essan lu tuttina aunc vegni a casa avon mesa notg (cul tandem).

Ocean City (New Jersey)

Suenter ch'il van fuva aunc adina buca semtgaus suenter il tschunavel di, havein nus priu la via sut las rodas ed essan carrai cun in Toyota Corolla direcziun sid, tochen Ocean City (insla).
In liug da vacanzas per famiglias nua ch'ei dat negin alcohol. ... SUPER! Quei fatg ha denton buca impediu nus da beiber in ni l'auter white russian importau sin la veranda ... cu tat Andrew e tatta Ida fuvan a letg, secapescha :-)


Proximamein suondan details da nies trip cun tandem da varga 80km tochen Cape May. Mo ton ... Marco sa buca pli co seser ... :-)

4 dis NYC

Suenter esser setschentai ils 14 da fenadur a NYC essan semess sin via encuter Peekskill. Leu havein nus passentau nossa emprema notg en x in camper damai che nies super van fuva naturalmein aunc buca semtgaus.
Il secund, il tierz ed era il quart di fuva la situaziun aunc adina la medema. Aschia che nus havein passentau quei temps a NYC.

Cheu eis ei schabegiau a nus differentas caussas legras e meins legras. Denter auter la suandonta historietta ...

NYC, ils 17-07-08 allas 15.25 sin la cruschada West 35 Street e Fashion Avenue el Starbucks. Corina sesanfla sin ils restrooms, Marco contempla la glieud ord finiastra ch'el vegn tuttenina surprius da dus umens en civil. Vesend la marca dil New York Police Departement seseva Marco sin la sutga cun bucca aviarta. "We search a "bankrauber" whit white pants, a black back and and a baseball cap." Suenter cuort haver giu il patratg da sefar ord la puorla cun 3 liters aua el sacados, ei Marco (sco adina) staus lucs ed ha aviert la siaranetga. Cheu ei il cass beinspert staus clars. Scroc - gie, "bankrauber" - na. :-)

La Corina, denton puspei anavos, ha naturalmein buca vuliu crer il schabetg casual.