Contonschiu la costa dil vest

Ils 21 da settember havein contonschiu il pacific - Santa Cruz, California. Il marcau che stat per il surfing. Per entscheviders sco nus dus ston ins denton per anflar in liug adattau. Schi freida sco l'aua ei entaupan ins naven dils pli pigns entochen ils pensiunai. Senza costum da neopren ... buca da tener ora ... brrr!
Suenter 2 meins far biala veta havein priu enta maun pic e pala, tschetschapuorla e scua. Aschia havein survegniu in suttetg e duas tratgas cauldas a di :-). Sin quella moda havein era empriu d'enconuscher la glieud indigena, saviu empristar ina ni l'autra aissa e finalmein giu temps da planisar la cuntinuaziun da nies viadi.
Avon che partir direciziun Los Angeles essan carrotschai enviers nord sur la Golden Gate Bridge, visitau il Bluegrass Festival, il pier 34 cun ils elefants da mar e la perschun dad Alcatraz a San Francisco.

Silsuenter essan plaunet carrai dalla costa dil vest giuadora sil Highway 1 (ina via che vesa ora semegliont sco las passaschas denter Versomi e Bonaduz) entochen a Los Angeles. Cheu havein priu cumiau da nies fideivel cumpogn da viadi Dodge che ha bunamein mai fatg il botsch.

Cunquei che nies sgol a Hawaii parteva gia baul la damaun havein inaga dapli schau pender ora il turist alternativ, spargnau ils raps pil hostel ed enstagl magliau 2 gadas tscheina sil port d'aviatica LAX. Avon che sgular aunc ina tschuglatta caulda havein buiu, ina ura pli tard egl aviu denton cun la fuera cumbattiu.
Il suentermiezdi dils 19 d'october essan arrivai a Big Island, Hawaii. Cheu vivin sin ina farm da cafe, mo tut stueis aunc buca saver;-) aloha!

Sequoia National Park

Suenter carrar in di sin vias pulleinas tras igl uaul dil Sequoia, (tochen sin 2600 meters e puspei engiu sin 300 m.s.m) havein contonschiu ils 19 da settember il parc naziunal. ... segir buca la pli sperta via.

Las enormas plontas da Sequoia, era numnadas plontas da mamut, ein sco il num di GIGANTICAS! Tochen 12 meters ladas (las pli ladas dil mund) e 90 meters aultas, la scorsa cun ina ladezia tochen 60 centimeters. Cheu essan vegni avon sco el mund da praulas. Tgi vesa Corina?

From the historical Route 66 to Las Vegas

Suenter il Grand Canyon essan carrai sin la Route 66 direcziun Las Vegas. Dus dis avon che partir sin quella ruta populara essan s'annunziai per il Fun Run 08, ina "cuosa" per oldtimers che ha liug mintg'onn denter Kingman e Williams. Sin la gliesta da partenza essan stai, la cuorsa denton mai carrai :-). Co lein dir ..., nies auto curdava si empau fetg denter tut ils auters. In camper da 20 onns denter autos dils onns 50 e 60, manteni sur decennis cun gronda passiun.

Aschia essan aunc quei di carrai tochen Las Vegas. Sueter durmir dus meins ordaviert sin campadis essan selegrai sco gronds da residar per treis dis en in hotel da quater steilas ... finalmein in letg! Sco vus saveis schai Las Vegas permiez il desiert, quellas circumstansias han meanau tiel fatg che quei pievel "malsaun" ha construiu in tetg (veseivels sin la fotografia) aschia ch'els san manipular l'aura sco els vulan. Fetg emperneivel, in tec sco il vent dalla mar, aschia che negin sto suar.
In roulette havein naturalmein era giugau denton massa raps buca gudignau. Ni detg auter, nus havein spiars ;-).

Enstagl da sfarlatar tut ils raps el casino, havein visitau il fantastic Cirque de soleil che vegn menaus si el MGM. In dils numerus Casinos bombastics che sesanflan ella via dil "Strip" ... tenor nies meini lev surfatg! ... New York New York, Paris Las Vegas, the Venetian, Planet Hollywood, Bellagio, Ceasars Palace, Luxor cun la Sphinks. Entirs monuments e baghetgs renomai en miniatura. Crazy town!

The turn around the Colorado plateau - part two

La secunda part dalla runda havein priu empau pli pacific. ... meins bia hikes, persuenter empriu d'enconuscher interessanta e cordiala glieud dad autras tiaras. Aschia havein gia fatg las connections necessarias per nies proxim viadi ... en cass che nus turnein insumma anavos;-)

Suenter haver visitau il mund dils babuns dils Indians da Pueblo a Mesa Verde ed haver anflau fastitgs da Navjo Indians vid las finiastra da nies auto el Monument Valley, havein beinspert priu la via sut las rodas. Sur il Lake Powell ed il Grand Canyon essan carrai direcziun Las Vegas.

Mesa Verde National Park, 5 - 6 da settember

Monument Valley, 7 - 09 da settember

Glen Canyon - Lake Powell, 8 - 10 da settember

Crand Canyon National Park, 10 - 12 da settember

The turn around the Colorado plateau - part one

Serevegni dil strapaz els Tetons essan arrivai ils 24 d' uost a Salt Lake City. Sper igl Olimpic Legacy Cauldron Park (il vitg olimpic dils giugs d'unviern 2002) havein visitau il Temple Square dils Mormons "Die Heiligen der letzen Tage". Christians che s'entaupan en in tabernachel per tedlar la vusch dil profet (ch' ei el medem mument president da quell' uniun) che referscha sur dil senn dalla veta. ... Tgi che crei vegn salvs. ;-)
L' auter di essan carrai 300 kilometers viers il sid tochen Cedar City, la porta tier la plattafuorma dil Colorado.
Las duas davosas jamnas havein oravontut gudiu la natira els fascinonts ed unics parcs naziunals. Cheu regia puspei tut in auter clima ... greppa, sablun, cactus e temperaturas tochen 40 grads. In' enzenna che nus vegnin pli datier dil desiert. La sitgira e stauncladad han denton buc impediu nus da far enzaconts "hikes". Semplamein gorgeos, amazing, wonderfull e tut ils auters adjectivs ch'ils Amis drovan aunc per descriver lur stadis!
Las impressiuns ...

Zion National Park, ils 26 - 28 d' uost

Bryce Canyon National Park, ils 29 - 31 d' uost

Capitol Reef National Park, ils 31 d' uost

Arches National Park, ils 1 - 4 da settember

Yellowstone e Grand Teton

Muniziunai per 2 jamnas cun tratgas ord la cuppa e resti suten da termos (ins sa gie mai ...), essan carrotschai ils 16 d'uost tras ina cuntrada da cuolms e lags e pli tard tras spess uaul tochen el plarc naziunal dil crap mellen. Il Yellwostone, igl emprem parc naziunal dil mund, che sesanfla sin ina caldera activa da 60 kilometers quadrat.
Duront 5 bellezia e calira dis, denton ferdaglia notgs (entuorn 0 grads celsius), havein denter auter saviu observar Bisons, Bull Elks (taurs tscharva), Mule Deers (enzatgei denter taurs tscharva e cavreuls), Bighorn Sheeps (famiglia dils anugls), Pronghorns (ina sort camutsch), pelicans e zigns. Sulettamein igl uors ed il luf havein buc entupau ... para las conservas han buca ferdau ;-).

Il Geysir Old Faithful, che spreza siadora l'aua sutterana sin in'altezia denter 30 e 50 meters, ei mo in dils highlights che attirescha entiras colonias da cars plein asiats el parc. Mintga puoz ei in object tschercau e sch'ei dat negin daventa schizun nies Van fotoghens.

Il hotel vischinont, in object historic ord lenn ei in ver palast, nua che nus sempels turists savein mo sesluitar viaden per prender ina comfortabla duscha ... suenter haver selavau quater dis cun aua freida sco ils gats :-).
La 5. notg havein passentau al pei dil Grand Teton (numnaus dils Franzos gronda teta ) che sesanfla el sid dil parc. Cura che havein viu ils bellezia greps ella cuntrada essan sesenti sco da casa. Spert eis ei stau clar che nus veglien contonscher il spitg dad in da quels tafers pezs.
L'auter di a bunura essan semess sin via cun ina salata da pasta, ina galona aua e dus meils els sacados.
Suenter entgins deturs pervia dalla neiv perpetna ed enzacontas gadas piarder il trutg havein cotonschiu da miezdi la siala dil Middle Teton (3902 msm). Jupiii! Cunquei ch'ei suflava taluisa essan denton beinspert turnai engiu. 11 uras pli tard essan stai leds da saver trer ora las pantoflas (!). ... quella gada havein definitiv surpassau nos cunfins!
Aunc dus dis pli tard palandravan enturon sco pupratschs:-).

Naven dalla tuor dil giavel a Cody

Ils 11 d'uost havein bandunau il stadi South Dakota.
All' entschatta dil stadi Wyoming havein visitau in curios alzament, il Devils Tower (386m) - la tuor dil giavel. Varga 20 pievels dils indians vesevan en quei monolit in liug sogn. En quei liug ei denter auter vegniu produiciu il film da Stephen Spielberg "Unheimliche Begenung der dritten Art".

Dus dis pli tard essan arrivai a Cody, il marcau ch' ei vegnius nummnaus suenter il legendar William F. "Buffalo Bill" Cody. Cheu havein naturalmein buc astgau munchentar il tradiziunal rodeo.
La sera avon che partir en direcziun dil parc naziunal da Yellowstone havein empruau da pinar il radio digl auto che haveva lagutiu ina cassetta. Per puder tier quella ha Marco baghegiau ora l' entira armatura. Cun agid dad in bienatsch che haveva ils dretgs uaffens ha Marco la finala rabitschau ora la cassetta. Dapi lu funciunescha il radio ... las cazzolas davos, la glisch directa e la tiba denton buca pli. Aschia stuein adina puspei empruar dad evitar sentupadas nocturnas cun la polizia. Tut schon vegniu avon! Cun sedar tups, haver buiu mo sirup;-) e posseder la dretga naziunalitad ei quei denton meins nausch.